2. Di tos djoûs I
Signeur, vos dmandez a voste Eglijhe d' esse li plaece po spåde li Boune
Novele, conte les toursireyes do monde. Dinez a vos efants del fwè assez
po k' i ndè furlexhe pont, mins purade k' i djåzexhe di Vos dvant les djins,
tot s' astocant so vosse Parole. Nos vs priyans-st insi pa Djezus-Criss,
vosse Fi, nosse Signeur et nosse Diu, li ci k' est Mwaisse do monde avou
Vos et l' Sint-Esprit, asteure, åd triviè des siekes, disk' a todi et po
todi. Åmen.
3. Di tos djoûs II
Vos ns avoz dné ces raplovowès priyires ci, et les priyires daegnreces
avou; vos avoz bén dit k' vos alîz schoûter les dmandes des deus u troes
cis ki s' rapoûlèt e vosse no. Asteure, schoûtez co on côp les priyires di
vos sierviteus, tot nos dnant d' conoxhe vosse verité e ç' daegn cial, et
nos dner l' veye po todi divins l' monde ki vént. Ca vs estoz l' Bon Diu,
et vos voeyoz voltî les djins. Eto, nos Vs adegnans, Vos, Pere et Fi et Sint-Esprit,
asteur, åd triviè des siekes, disk' a todi et po todi. Åmen.
4. Po-z ene Messes al nute
Vos, Bon Diu, vs avoz metou loumire et noerixheur erî ene di l' ôte,
et Vs avoz lomé l' loumire «djoû» et l' noeristé, «nute». Dabôrd, xhovez
evoye di nos cours li noerixheur di nos petchîs, et fijhoz k' nos arivanxhe
al vraiye loumire, k' est l' Crisse, li ci k' est Mwaisse do monde avou Vos
et l' Sint-Esprit, asteure, åd triviè des siekes, disk' a todi et po todi.
Åmen.
5. Po l' sofrixhance do Crisse
(u po on djoû d' djunne)
Signeur Djezus-Cris, vos avoz fwait ki l' rénnvåt k' aveut ricnoxhou
ses petchîs våye del croes direk a vosse Paradisse. Tot ricnoxhant nos prôpes
petchîs, nos vs priyans : cwand nos mourrans, drovoz nos les ouxhs do Paradisse.
Nos vs priyans vominme, k' est Mwaisse do monde avou l' Pere et l' Sint-Esprit,
asteure, åd triviè des siekes, disk' a todi et po todi. Åmen.
6. Po l' Sint-Esprit
Schoûtez nosse priyire, Bon Diu ki poite tot dins ses mwins.
Come å djoû del Céncweme, fijhoz kel Criss evoye
li blamant Esprit so voste Eglijhe, po
k' i loume li cour des cis k' vos avoz fwait k' il nexhexhe di
novea, et po k' i les fwaixhe sigurs dins vosse gråce. Nos vs priyans-st
insi pa l' minme Djezus-Criss, nosse Signeur et nosse Diu, li ci
k' est Mwaisse do monde avou vos et l' minme Sint-Esprit, asteure, åd triviè
des siekes, disk' a todi et po todi. Åmen.
7. Po ls Avéns et po l' Noyé
Pa l' sene amerviyant di l' Aviedje ki met-st å monde, vos avoz fwait
ki l' monde kinoxhe li loumire di vosse glwere. Aidîz ns a fé l' fiesse do
mistere di vosse ecoirpixhaedje*, avou ene sigure fwè, et tot schoûtant nosse
cour. Nos vs priyans vos minme, k' est Mwaisse do monde avou l' Pere et l'
Sint-Esprit, asteur, åd triviè des siekes, disk' a todi et po todi. Åmen.
8. Al dicåsse
Signeur, tchaeke anêye vos fjhoz k' nos vicanxhe di novea li djoû k'
ciste eglijhe cial a stî rabeneye. Asteure schoûtez les priyires di vosse
peupe. Dinez nos k' nos acoplixhanxhe ciddé ene liturdjeye ki vs rinde glwere
a vos et ki nos rabenixhe nozôtes. Nos vs priyans vos minme, k' est Mwaisse
do monde avou l' Pere et l' Sint-Esprit, åd triviè des siekes, disk' a todi
et po todi. Åmen.
9. Po l' Aviedje Mareye
Diu mierbon, dinez a vos sierviteus li sainteye di leus åmes et leus
coirs, et, pa les grandès priyires di l' Aviedje Mareye, metoz fén azès sofrixhances
di ç' monde et dnez nos d' goster les djoyes ki dmeurront po todi. Nos vs
priyans-st insi pa Djezus-Criss, vosse Fi, nosse Signeur et nosse Diu, li
ci k' est Mwaisse do monde avou vos et l' Sint-Esprit, asteure, åd triviè
des siekes, disk' a todi et po todi. Åmen.
10. Po on Sint Eveke
k' a viké dins nosse payis
Bon Diu todiyeu**, ki poite tot dins ses mwins, vs avoz vlou k' Sint
N. apoirtaxhe li loumire del Boune Novele a nos ratåyes. Paski nos avans
l' no d' crustins d' lu, fijhoz ki l' fwè d' nos cours si mete so pîs dins
nosse vicaedje. Nos vs priyans-st insi pa Djezus-Criss, vosse Fi, nosse Signeur
et nosse Diu, li ci k' est Mwaisse do monde avou vos et l' Sint-Esprit, åd
triviè des siekes, disk' a todi et po todi. Åmen.
11. Po on ôte Sint, ene ôte Sinte
Signeur k' est sint, ey i n' a k' vos, foû vos minme nouk n' est bon. Pa l' priyire di Sint
(e
)
N., dinez nos d' savu risponde cwand vs nos houkîz, po k' nos n' soeyanxhe
måy foû d' vosse glwere po todi. Nos vs priyans vos minme, k' est Mwaisse
do monde avou vos et l' Sint-Esprit, asteure, åd triviè des siekes, disk'
a todi et po todi. Åmen.
12. Po les moirts
Signeur, vos ns avoz mostré l' foice di vost amour cwand vosse
Fi a vlou sofri po nozôtes disk' a mori so ene croes. Ouy nos croeyans co
a vost amour et vosse poûxhance. Dinez a vosse sierviteu
(sse
) N., k' est nosse fré
(sour
), k' i
(ele
) pregne pårt al victwere do Criss sol moirt, et k' i
(ele
)
comunyîxhe al veye di ci Criss raviké, k' est Mwaisse do monde avou vos
et l' Sint-Esprit, asteure, åd triviè des siekes, disk' a todi et po todi.
Åmen.
_________________
* ecoirpixhaedje = ki vs avoz prins coir.
** eternel