Litu-Wal

- Priyans po k' nosse dægn kinoxhe li påye.

R. : Signeur, purdoz pitié. (Tos côps)

- Po les bons crustins ki wårdexhèt todi li droete fwè.
- Po nosse Påpe ..., po nost eveke (nost årtchuveke)... et po tos cis ki sont nos frés divins l' Crisse.
- Po nosse Rwè... et nosse Royinne..., ki voeyèt voltî l' Crisse.
- Pol veye di nos sôdårts, ki voeyèt voltî l' Crisse.
- Po nos parints et nos frés, po les cis k' sont evoye divant nozôtes.
- Po les cis k' ovrèt ey overront po nozôtes.
- Po les cis k' nos volèt do må et po les cis k' nos voeyèt voltî.
- Po les cis ki nos cmandît k' nos priyénxhe por zels, minme si nos n' estans nén bons.
- Po k' les prijhnîs, totavå l' Daegn, soeyénxhe rilåtchîs.
- Po tos les cis k' sont so les voyes, po k' trovénxhe amagnî et djîsse.
- Po les cis k' ont tcheyou malådes, po k' i rwerixhénxhe bénrade.
- Po nos cinsîs aveur des bounès dinrêyes.
- Po tos nos frés et soûs, ki croeyèt dins l' droete fwè, po les cis k' sont evoye divant nozôtes, et ki doirmèt el påye ciddé et totavå.
- Priyans eto po nozôtes minmes.

Po les priyires di nos sints ratayons, Signeur Djezus-Cri, nosse Bon Diu, purdoz pitié et rischoyoz ns ! Åmen.

Rashonnés po fé l' fiesse del Ucaristeye, priyans comifåt l' Signeur ki vout rischeure tos les djins.

- Po kel Signeur soeye binåjhe di dner å peupe crustin li påye et l' unité, priyans tertos eshonne.

R. : Foirts di vost amour, et assurés d' nosse fwè, Signeur, wai, nos vs priyans.

- Po k' i soeye binåjhe di nos dner et nos wårder nos dveres, priyans tertos eshonne.
- Po kel Signeur pardone les petcheus et rwerixhe les rascråwés, priyans tertos eshonne.
- Po k' el Bon Diu acviernêye nos cours, po nozôtes ni fé ki çou k' i voet voltî, priyans tertos eshonne.

Schoûtez nos dmandes et nos rcwesses, Vos, Bon Diu, pa Djezus-Criss, vosse Fi, nosse Signeur. Åmen.

- Dijhans tertos, di tote noste åme et di tot nosse cour ; dijhans :

R. : Signeur, purdoz pitié. (Tos côps)

- Signeur ki poite tot dins ses mwins, li Bon Diu d' nos tayons, nos vs priyans : schoûtez nos et s' purdoz pitié.
- Åyoz pitié d' nozôtes, Bon Diu, vos k' est bon ; nos vs priyans schoûtez nos et s' prindoz pitié.
- Nos vs priyans co po nosse Påpe ..., po nost eveke (nost årtchuveke)... et po tos les cis ki sont nos frés divins l' Criss.
- Nos vs priyans co po nos frés les cis k' sont priyesses, diåkes, rilidjeus et rlidjeuses, et po tos les cis ki, pa l' Criss, nos sont des frés.
- Nos vs priyans co po les croeyants d' nos rapoûlaedjes; po k' il åyexhe sogne, veye, påye, sinté, rischoyaedje, astoca et pardon ; et po k' i laixhexhe djusse leus petchîs.
- Nos vs priyans co po les cis k' ont fwait et ki aidèt noste eglijhe, les cis k' sont benis et k' on cåze todi d' zels; nos priyans eto po nos frés et nos sours, zels ki croeyént li droete fwè, les cis k' sont evoye divant nozôtes, et ki doirmèt el påye ciddé et totavå.
- Nos vs priyans co po es cis k' apoirtèt çou k' i polèt dins nosse sinte et bele eglijhe, po les cis k' sofrèt, po les cis k' tchantèt, et po tos les djins raploûs, ki rastindèt bråmint on grand sogne.

Signeur nosse Bon Diu, riçuvoz cisse bolante priyire di vos sierviteus, et åyoz pitié po nozôtes, vos k' est bon; dischindoz vos pitiés so nozôtes et so totès les djins ki rastindèt bråmint vosse grand sogne; ca vs estoz on Diu sogneus et vos voeyoz voltî les djins, et vaici nos vs rindans glwere a vos, Pere et Fi et Sint-Esprit, asteure, åd triviè des siekes, disk' a todi et po todi. Åmen.

_________________________

* - Li prumîre priyîre denéye come egzimpe est eployeye å coron del après-soper (priyîre di dvant di s' coutchî) do rite bizantin.