Priyîre Ucaristike II

1. Diewåde
Li Priyesse : Qui l' Sègneur seûye avou vos-ôtes !
Les Croeyeus : Èt qu' i mine vos pinsêyes !
Li Priyesse : Fans monter bin hôt nos coûr !
Les Croeyeus : Nos l' drovians å Sègneûr.
Li Priyesse : Dihans mèrci å Sègneûr, nosse Bon Diu !
Les Croeyeus : Ci n' èst qu' djusse èt fwért bon.

2. Grande Priyîre
Li Priyesse :
Awè, c'èst vrêye, todi èt tot costé,
ci n' èst qu' djusse èt bon di v' dîre mèrci,
a vos qu' èst nosse Pére, a vos qu' èst télemint sint.
Nos l' fans par Jèzus-Cri, vosse Fi, qui v' vèyez si vol'tî.
Il èst vosse Parole, i vike èt fêt viker tot çou qu'i-n-a so l' tére.
Vos nos l' avez èvoyî po nos r'mete so pîd èt nos såver.
Il èst Diu, èt l' Sint-Èsprit 'nn' a fêt in-ome,
èt l' Avièrje Marèye l' a metou å monde.
Po fé disqu' å d'bout çou qu' vos volîz
èt po-z-atirer d' å mitan d' tos lès ômes
lès cis qui d'vît div'ni vosse peûpe,
a l' eûre di s' passion, il a strindou sès mins.
Il a mêstri l' mwért
èt l' a mostré a turtos qu' on poléve raviker.
Vola poqwè qu' avou lès-andjes èt tos lès sints,
nos tchantans bin hôt vosse glwére.
Èt turtos èssonne nos d'hans :
Turtos :
Sint, treûs côps sint
l' Sègneûr, Mêsse dè monde ètîr !
Vosse glwére rimplih li cîr èt l' tére.
Hozanna ! Nos n' èl sårîs brêre fwért assez !
Qu' i seûye bèni l' ci qui vint dèl pårt dè Sègneûr
Hozanna ! brèyans-l' di tos nos pus fwérts !
Li Priyesse :
Vos-èstez vrêmint sint,
vos èstez l' fontinne qui done li sinteté.
3. Epiclejhe
C' èst po çoula qu' nos v' dimandans
d' rinde tot-a-fêt sintes lès ofrandes qui nos v's-apwèrtans,
tot fant d'hinde dissus voste Èsprit.
Qu' èle div'nèsse po nos-ôtes li cwér () èt l' sonk'
di Jèzus-Cri, nosse Sègneûr.
4. Ashidædje
Å moumint qu' il aléve èsse vindou
èt, di s' bone vol'té, èdurer s' Passion
i prinda l' pan d'vins sès mins,
i d'ha mèrci a s' Pére,
èl pårtèdja èt l' distribuwa a sès dicipes tot d'hant :

« Tinez, magnîz-è turtos,
Çoula, è-bin c' èst m' cwèr
qui dj' done po vos-ôtes. »

Adon, i fa parèy
avou l' cålice rimpli d' vin.
Co on côp i d'ha mèrci a s' Pére
èt l' dina a sès dicipes tot d'hant :

« Tinez, buvez-è turtos,
pace qui çoula, è-bin c' èst m' sonk',
li sonk' qui nos ralôye å Pére po todi,
come jamåy nos n' l' avans stu.
I sèrè n'né por vos-ôtes èt po turtos,
èt lès pètchîs sèront pardonés.
Et vos-ôtes, a vosse toûr, vos f'rez parèy
tot v' som'nant d' mi. »
Les Croeyeus :
Al tchûse :
Qui c' èst bê ! Qui c' èst grand !
C' è-st-on mistére èt nos l' crèyans.

Ou bin :
Vos-avez passé po l' mwért, Sègneûr Jèzus.
Nos l' brèyans bin hôt !
Vos v's-avez r'lèvé bin vikant !
Nos v' fans fièsse !
Vos-alez rim'ni èl glwére.
Nos v' ratindans.
5. Anamnejhe
Li Priyesse :
Asteûr, nos nos som'nans dèl mwért èt dèl rézurècsion d' vosse Fi,
èt nos v' prézintans, Sègneûr,
li pan qu' done vèye èt l' vin qu' nos va såver,
èt si v' dihans-gn' mèrci pace qui vos nos-avez tchûzi
po-z-èsse a vosse chèrvisse.
6. Ditikes
Èt vola qu' nos nos fans tot p'tits, chal, divant vos, po v' dimander
qu' en partèdjans l' cwér èt l' sonk' dè Cris',
li Sint-Èsprit nos rassonne
di manîre a n' pus fé qu' on seûl cwér.

Sègneûr, sov'nez-v' di voste Èglîse tot-avå l' monde.
Fez-l' todi crèhe è voste amoûr,
avou nosse Påpe ...,
noste Èvèke...
èt tot lès cis qu' ont l' tchèdje di vos djins.

Sov'nez-v' ossu d' nos frés qu' ont clôs leûs-oûy,
sûrs di r'trover on djoû l' vèye.
Sov'nez-v' di tos lès-omes qu' ont dèdja qwité
ç' monde-chal.
Droviez-'lzî vosse pwète,
qu' i s' ritrovèsse ad'lé vos, è vosse loumîre.

Èt po fini, nos v's-èl dimandans,
spårdez vosse bonté so nos-ôtes turtos.
Fez qu' avou l' Avièrje Marèye, vosse mame,
avou l' flouhe dès Sints d' tot lès tins qu' ont djoûrmåy
stu fidéles a voste aliyance,
nos polanse ataker 'ne deuzinme vèye, li seûle vrêye èt sins nole fin,
po tchanter constanmint vosse glwére
èt vosse grandeûr.
Par nosse Sègneûr Jèzus-Cri.
Les Croeyeus : Åmen.
Li Priyesse :
Par lu, avou èt d'vins lu.
A vos, nosse Pére, qu' èst Mêsse dè monde
èt qui n' fêt qu' onk avou l' Sint-Èsprit,
nos rindans oneûr èt glwére
po tos lès siékes a m'ni.
Les Croeyeus : Åmen.

Et pwis, dijhans l' Påtér, come l' a stî mostré sul pådje avou l' tecse del messe.