Sign In Sign-Up

Gloria

Raplovowe priyîre

Epite

Li lijeu(se) : Lijhaedje del lete (u del live) ...
On pout prinde ene miete del Djeneze , pa-z egzimpe, k' a stî rmetowe pa Monsieu Lorint Hendschel.
Èt po fini : Parole dè Bon Diu.
Les Croeyeus : Glwére å Vos, Sègneûr.


Vos ploz vey kékes psåmes et ålèlouyeas èl 2-e assinte .

Li Priyesse : Qui l' Sègneûr seûye avou vos-ôtes !
Les Croeyeus : Et avou vos tot fî parèy.

Li Priyese : Li Bone Novèle di Jèzus-Cri come l' a scrît Sint...
Les Croeyeus : Glwére å Vos, Sègneûr.

Li priyesse lét l' Boune Novele. Vos ploz prinde on tecse des Evandjîles ( Matî , Mår , Luk et Djhan ) rimetowes pal Pére Lecomte SJ, rimetaedjes ricnoxhous avou l' « Imprimatur » pa l' eveke di Lîdje, ki sont co dins l' accint del Hôte Årdene, u eto di l' Evandjile sicrîte pa Mår , rimetowe pa Djôzef Mignolet, ricnoxhowe avou l' « Imprimatur », pal vicaire djenerå d' Lidje.

Èt po fini : Vola sûr ine bone parole.
Les Croeyeus : Sèyîz' bèni, Sègneûr !


Li rmetaedje del Messe e walon d' Lidje n' a pont d' Credo d' Nicêye-Costentinope.
Si vos vloz prinde li Credo d' Nicêye-Costentinope, vos avoz ciddé on ratournaedje e rfondou walon.

Dji croe-z en on seul Bon Diu, li Pere ki poite tot dins ses mwins, k' a fwait l' Cir eyet l' tere, totes les djins et totes les sacwès, les cenes k' on voet et les cenes k' on n' voet nén.

Et dji croe-z en on seul Signeur, Djezus-Crisse, li Fi di Diu, et i n' a yeu k' ci-la, k' a nexhou do Pere, divant tos les siekes ; k' est Bon Diu skepyî do Bon Diu, loumire sikepieye del loumire, vraiy Diu skepyî do vraiy Diu, k' a nexhou mins ki n' a nén stî creyé, li ci k' est del minme nateure ki l' Pere, et k' c' est pa lu ki tot a stî fwait.

Li ci ki, po nozôtes et po k' on soeye schapés, a dischindou do Cir, et prinde li coir do Sint-Esprit et di l' Aviedje Mareye, et divni ene djin come nozôtes.

Li ci k' a stî crucifyî po nozôtes, des trevéns da Ponce Pilåte, et k' end a sofri mårtire, et k' a stî eteré, et raviker l' troejhinme djoû, come les Vîs Scrijhaedjes l' avént bén dit, eyet monter å Cir, et ouy k' est ashî al droete do Pere, et ki rvénrè avou s' glwere, po djudjî les vicants et les moirts ; et si rweyåme serè come èn åbe k' on n' voet nén s' copete.

Et dji croe-z e l' Esprit Sint, li ci k' est Signeur eyet k' a fwait l' veye, ki sûne do Pere [et do Fi], li ci k' on s' adjnole divant lu, et l' glorifyî, sifwaitmint kel Pere eyet l' Fi, li ci k' a pårlé pås profetes.

Eyet dji croe-z en ene seule Eglijhe, sinte, catolike ey apostolike.

Dji ricnoxhe on seul bateme po nos rmete nos petchîs.

Dji rawåde li ravicaedje des moirts, eyet l' veye ki dmeurrè po todi.

Åmen.

Co vs avoz eto vaici l' Credo des aposses :

Di tot m' coûr dji creû å Bon Diu.
Il èst nosse Pére èt l' monde èst dvins sès mins.
C' èst lu qu' a fêt l' cîr èt l' tére.
Dji creû a Jèzus-Cri
qu' èst s' Fi èt nosse Sègneûr.
I s' a fêt ome par l' amoûr dè Sint-Èsprit
èt l' Sinte Vièrje Marèye l' a mètou å monde.
Dè tins d' Pilåte, il a sofrou mwért èt passion.
On l' a clawé so l' creû,
il a rindou l' åme,
on l' a èssèveli.
Il a d'hindou ad'lé lès mwérts.
Mins l' treûzinme djoû, i s' a r'lèvé bin vikant.
Il a r'monté s' achîr al dreûte di s' Pére.
On djoû, i r'vêrè po-z-èsse djudje dès vikants èt dès mwérts.
Dji creû å Sint-Èsprit.
Dji creû d'vins l' Èglîse, qu' èst la po l' monde ètir
èt qu' fêt pårt inte turtos di çou qui l' Bon Diu nos done.
Dji creû qu' on pout todi èsse pardoné
èt qu' on djoû, on veûrè chaskeun' si r'lèver
èt viker po tofér.
Åmen.

I nn end a pont d' foume avou pår. Mins vos trovez sacwantès modeyes di daegnrece priyire, el 4-e acinte .


Li Priyesse : Come vosse prôpe Fi nos l' a-st-ac'sègnî èt come i nos l' a k'mandé, nos n' avans nin sogne dè dire :
Turtos dijhèt l' priyire do Signeur :

(E rfondou walon :) Vos, nosse Pere qu' est la-hôt, Ki vosse nom seuye beni cint côps. Ki li djoû vegne k' on v' ricnoxhe come mêsse. K' on vos schoûte sul tere come å cîr. Dinez nos ådjourdu li pwin po nosse djournêye. Fijoz ene crwès su tos nos petchîs Come nos l' fijans eto su les petchîs des ôtes. Ni nos leyîz nén tchêr dins l'inveye di må fé, Mins tchessîz li må lon erî di nos ôtes.

(E walon d' Lidje :) Vos, nosse Pére qu' èst la-hôt, qui vosse no seûye bèni co cint côps. Vinse li djoû qu' on v'rik'nohe come Mêsse. Qu' on v'hoûte so l' tère comme å cîr. Dinez-nos tot djusse nosse nosse pan po l' djoûrnêye. Fez' ne creûs so tos nos måkemints. Come nos l' fans ossu so lès måkemints dès-ôtes. Ni nos lèyîz nin aler a voleûr må fé, min tchèssîz l' må lon d' nos-ôtes.

Li Priyesse :

Awè, tchèssîz tos lès må lon d' nos-ôtes, Sègneûr,
èt n'nez l' påye å monde.
Dè moumint qui v's-èstez bon, disloyîz-nos dè pètchî.
Rapåftez-nos d'vant lès racros di ç' vèye-chal :
Nos comptans bin sol l' boneûr qui v' promètez
et nos ratindans qu' Jèzus-Cri nos r'vinse såver.

Les Croeyeus :

Å rèsse, c' è-st-a vos et a vos tot seû
qui r'vint li glwére d' èsse nosse Rwè
et nosse Mêsse,
tot-å-long dès siékes. Åmen.

Li Priyesse :

Sègneûr Jèzus-Cri,
Vos-avez dit ås-apôtes :
« Mi påye, dji v's-èl lê.
Mi påye, dji v's-èl done. »
Ni fez nin astème a nos pètchîs,
mins som'nez-v' seûlemint qui tos nos-ôtes,
nos crèyans è vos.
Po qu' nos sèpanse fé come vos l' volez
dinez-nos todi vosse påye
et qu' tot fant hôt,
nos v' sûvanse turtos sol minme vôye.
Vos, nosse Mêsse,
tot-å-long dès siékes.

Les Croeyeus : Åmen.
Li Priyese : Qui l' påye dè Signeûr seûye todi avou vos-ôtes !
Les Croeyeus : Et qu' èle rimplihe nos coûrs !

Turtos :

Sègneûr, come l' ognê so l' åté,
vos qu' a pri so sès spales tos lès måkemints dè monde,
prindez pîtié d' nos-ôtes.

Sègneûr, come l' ognê so l' åté,
vos qu' a pri so sès spales tos lès måkemints dè monde,
prindez pîtié d' nos-ôtes.

Sègneûr, come l' ognê so l' åté,
vos qui roûvèye po d' bon çou qu' lès-omes ont fêt d' må,
acwèrdez-nos vosse påye.

D' aboird, toltins u après ki l' priyesse fwait l' pårtixhaedje do pwin ucaristike, on ndè pout dire ene priyire di dvant d' comunyî, l' yene des deus prumîres del 6-e assinte . Cwand li priyesse met dins l' cålice ene miete do pwin ucaristike, i dit cisse orémusse cial :

Ki l' coir et l' sank do Crisse, rapolous dins ç' cålice cial, seuyexhe nosse marinde pol veye todiyrece.

Pwis :

Li Priyese :

Qu' i sèyèsse binåhes lès cis
qui l' Sègneûr prèye a s' tåve !

La vosse Sègneûr, l' èvoyî dè Bon Diu,
po pwèrter nos måkemints !

Les Croeyeus :

Sègneûr dji n' so nin bon assez po v' riçure,
mins v' n' avez qu' on mot a dîre
et dj' sèrè r'mètou so pids.

Tot comuniant, li priyesse dit :

Ki l' coir do Crisse m' wåde pol veye todieusse !
Ki l' sank' do Crisse m' wåde pol veye todieusse !

Tot dnant li comunyon azès croyeus, on leu dit :

Li coir do Crisse. Li sank do Crisse.

El tins del conumyon, on pout tchanter ene atiyene, pa-z egzempe :
Dji pudrè l' cålice del rischædje et dji houkrè l' no do Signeur.

Cwand li priyesse lave li cålice, i dit :
Signeur, nos vlans riceure voltî dins nos cours li ci k' nos avans magnî. Ki cisse comunyon sul tere seuy-t ene marinde pol cîr.


Li Priyesse : Priyans l' Signeur.

Li pan qui vos nos-avez d'né, Sègneûr,
nos-a fêt on novê coûr.
I fêt crèhe nos crèyances, i fêt crèhe l' èspèrance
èt nos done li fwèce di vèyî vol'tî nos frés.
Aprindez-nos a todi aveûr fin dè Cris',
lu qu' èst l' seûl pan qui nos done li vèye.
Aprindez-nos, Sègneûr a viker dès paroles
qui vinront di vosse boke.

Nos v' priyans-st-insi par Jèzus-Cri, vosse Fi,
nosse Sègneûr èt nosse Diu,
qu' èst Mêsse dè monde
avou vos èt l' Sint-Èsprit,
å-d-triviès dès siékes,
asteûr èt todi.

Les Croeyeus : Åmen.

Li Priyesse : Qui l' Sègneûr seûye avou vos-ôtes !
Les Croeyeus : Et avou vos tot fî parèy.

Li Priyesse : Qui l' Bon Diu v' bènihe, li Pére, li Fi èt l' Sint-Èsprit !
Les Croeyeus : Åmen.

Li Priyesse : Alans-è avou l' påye dè Cris'.
Les Croeyeus : Èt co cint côs merci Sègneûr !