1. Diewåde
Li Priyesse :
Qui l' Sègneur seûye avou vos-ôtes !
Les Croeyeus :
Èt qu' i mine vos pinsêyes !
Li Priyesse :
Fans monter bin hôt nos coûr !
Les Croeyeus :
Nos l' drovians å Sègneûr.
Li Priyesse :
Dihans mèrci å Sègneûr, nosse Bon Diu !
Les Croeyeus :
Ci n' èst qu' djusse èt fwért bon.
2. Grande Priyîre
Li Priyesse :
Awè, c'èst vrêye, todi èt tot costé,
ci n'èst qu' djusse èt bon di v' dîre mèrci,
a vos qu'èst nosse Pére, a vos qu'èst télemint sint.
Nos l' fans par Jèzus-Cri, vosse Fi, qui v' vèyez si vol'tî.
Il èst vosse Parole, i vike èt fêt viker tot çou qu'i-n-a so l' tére.
Vos nos l' avez èvoyî po nos r'mete so pîd èt nos såver.
Il èst Diu, èt l' Sint-Èsprit 'nn' a fêt in-ome,
èt l' Avièrje Marèye l' a metou å monde.
Po fé disqu' å d'bout çou qu' vos volîz
èt po-z-atirer d' å mitan d' tos lès ômes
lès cis qui d'vît div'ni vosse peûpe,
a l' eûre di s' passion, il a strindou sès mins.
Il a mêstri l' mwért
èt l' a mostré a turtos qu' on poléve raviker.
Vola poqwè qu' avou lès-andjes èt tos lès sints,
nos tchantans bin hôt vosse glwére.
Èt turtos èssonne nos d'hans :
Turtos :
Sint, treûs côps sint
l' Sègneûr, Mêsse dè monde ètîr !
Vosse glwére rimplih li cîr èt l' tére.
Hozanna ! Nos n' èl sårîs brêre fwért assez !
Qu' i seûye bèni l' ci qui vint dèl pårt dè Sègneûr
Hozanna ! brèyans-l' di tos nos pus fwérts !
Li Priyesse :
Awè, c' èst vrêye, vos-èstez sint, vos-èstez l' Mêsse dè monde ètîr,
èt tot çou qui v's-avez prusti d' vos mins tchante
bin hôt vosse grandeûr.
Pace qui c'èst vos qu' done li vèye,
c'èst vos qu' done li sint'té a tot çou qu' i-n-a so l' tére,
gråce a vosse Fi Jèzus-Cri, nosse Sègneûr,
èt çoula avou l' fwèce dè Sint-Èsprit.
Vos n' lèyîz nin dè r'mète èssonne
vos djins afîs' qui, tot costé d'vins l' monde,
i v' polèsse ofri çou qu' i-n-a d' mèyeû.
3. Epiclejhe
Vola pokwè qu' nos supliyans
d' consacrer vos minme
li pan èt l' vin qu' nos apwèrtans d'vant vos.
Qui voste Èsprit 'nnè fêsse ine sakwè d' sint
qui d'vinrè l' cwér (†) èt l' sonk'
di Jèzus-Cri, nosse Sègneûr.
C' è-st-on mistére, mins c'èst lu qu' nos-a dit d'èl fé.
4. Ashidædje
Li nut' minme qu' a stu vindou
i prinda l' pan,
i r'mèrciha s' Pére,
i discôpa l' pan
èt l' dina a sès dicipes tot d'hant :
« Tinez, magnîz-è turtos,
Çoula, è-bin c' èst m' cwèr
qui dj' done po vos-ôtes. »
Èt come i finihît d' magnî, al fin d' l' eûrêye
i prinda l' cålice, co n' fêye i r'mèrciha s' Pére
èt l' dina a ses dicipes tot d'hant :
« Tinez, buvez-è turtos,
pace qui çoula, è-bin c' èst m' sonk',
li sonk' qui nos ralôye å Pére po todi,
come jamåy nos n' l' avans stu.
I sèrè n'né por vos-ôtes èt po turtos,
èt lès pètchîs sèront pardonés.
Et vos-ôtes, a vosse toûr, vos f'rez parèy
tot v' sov'nant d' mi. »
Les Croeyeus :
Al tchûse :
Ki c' est bia ! Ki c' est grand !
C' e-st-on mistere et nos l' croeyans.
Ou bin :
Vos avoz passé po l' moirt, Segneur Djezus.
Nos l' broeyans bén hôt !
Vos avoz raviké !
Nos vs fijans fiesse !
Vos aloz rivni el glwere.
Nos vs ratindans.
5. Anamnejhe
Li Priyesse :
Asteûr, nos nos sov'nans d'vosse Fi.
Il a sofrou po nos såver,
il a raviké d'vins tote si glwére,
il a r'monté å cîr ad'lé vos.
Tot ratindant qu' i r'vinse ine fèye po tot, nos v' prézintans,
po v' dire merci,
l' ofrande qu' èst chal so l' åté.
Elle èst sinte èt bin vikante.
6. Ditikes
Sègneûr, fez astème å sacrifice di voste Églîse.
Vos vèyez bin, èdon, c'èst l' cisse di vosse Fi,
qu' nos-a r'metou avou vos.
Qwans n' sèrans r'noûris di s' cwèr èt di s' sonk'
èt tot rimplis dè Sint-Èsprit,
adon, gråce a vos, nos n' f'rans pus qu'onk
avou nosse Sègneûr Jèzus-Cri.
Qui l' Sint-Èsprit fêsse di nos-ôtes, po todi,
on prézint a vosse glwére,
di manîre a-z-aveûr dreût ås bins d'l' ôte
dès costés, ad'lé l' Avièrje Marèye, li mame dè Bon Diu,
lès-Apôtes, lès mårtîrs èt tos lès sints
qui n' lèyèt nin d' pårler po nos-ôtes.
Èt asteûr, Sègneûr, cåse dè sacrifice
qui nos r'mèt' d'acwèrd avou vous,
spårdez so l' monde ètîr vosse salut èt vosse påye.
Rastokez l' fwè èt l' charité dè voste Èglîse tot-al dilongue
di s' vôye so l' tére.
Åyez' bone sogne di vosse sèrviteûr li påpe ...,
di noste Èvèke..., di tos lès-Èvèkes, dès priyesses,
dès diakes èt dè peûpe di tos lès cis qui v's-avez ratch'té.
Hoûtez lès påters di vosse famile qu' èst chal divant vos.
Èt pusqui v' lès vèyîz vol'tî, raminez' ad'lé vos
tos vos-èfants èvôye tot-avå l' monde.
Nos v' priyans po tos nos frés èt soûrs qu' ont clôs leûs-oûy,
po lès-cis qu' ont qwité ç' monde-chal :
vos savez bin qu' il ont tchèrî dreût.
Drovez-l' zî l' ouh di vosse mohonne,
wice qui nos comptans vin viker d'vins vosse glwére,
turtos èssonne èt po todi.
Par nosse Sègneûr Jèzus-Cri,
qui s' tchèdje di nos n'ner djoûrmåy vos gråces
èt tot çou qu' i-n-a d' bon.
Par lu, avou èt d'vins lu.
A vos, nosse Pére, qu' èst Mêsse dè monde
èt qui n' fêt qu' onk avou l' Sint-Èsprit,
nos rindans oneûr èt glwére
po tos lès siékes a m'ni.
Les Croeyeus : Åmen.
Et pwis, dijhans l' Påtér, come l' a stî mostré sul pådje avou l' tecse del messe.
