1. Diewåde
Li Priyesse :
Qui l' Sègneur seûye avou vos-ôtes !
Les Croeyeus :
Èt qu' i mine vos pinsêyes !
Li Priyesse :
Fans monter bin hôt nos coûr !
Les Croeyeus :
Nos l' drovians å Sègneûr.
Li Priyesse :
Dihans mèrci å Sègneûr, nosse Bon Diu !
Les Croeyeus :
Ci n' èst qu' djusse èt fwért bon.
2. Grande Priyîre
Li Priyèsse :
Nos v' dihans mèrci, a vos, nosse Pére.
On pout todi compter
sor vos,
qu' nos rlouke tofér si amitieûsemint.
Vos nos-avez n'né Jèzus vosse Fi, nosse Sègneûr èt nosse Fré.
I nos-a mostré qu' i vèyéve voltî lès
poves, lès malådes,
lès p'titès djins èt minme lès cis qu' lî toûrnît l' dos.
Il a må po nos-ôtes qwand i nos veût èl ponne.
Tot çou qu' il a fêt èt tot çou qu' il a dit nos done a ètinde qui v' prindez
sogne dès-omes, come on pére prind sogne di ses-èfants.
C' èst po tot çoula qu' nos v' fans fièsse.
Nos prôclamans bin hôt vosse bonté, qu' vos dispårdez, sins r'lache, et,
avou lès andjes èt tos les sints dè paradis, nos tchantans bin hôt vosse
glwére.
Turtos :
Sint, treûs côps sint
l' Sègneûr, Mêsse dè monde ètîr !
Vosse glwére rimplih li cîr èt l' tére.
Hozanna ! Nos n' èl sårîs brêre fwért assez !
Qu' i seûye bèni l' ci qui vint dèl pårt dè Sègneûr
Hozanna ! brèyans-l' di tos nos pus fwérts !
Li Priyesse :
Nos tchantans vosse glwére, Sègneûr !
Vos-èstez todi so l' vôye a costé d' nos-ôtes,
apreume qwand vosse Fi Jèzus nos fêt m'ni turtos
èssone achîr a s' tåve po viker è si-amoûr.
Come i l' a fêt di ç' tins-la po lès dicipes d' Emmaüs,
i nos fêt comprinde çou qu' èst scrît d'vins l' Bîbe
èt pårtèdje li pan inte nos-ôtes turtos.
3. Epiclejhe
C' èst po çoula qui nos-v's-èl dimandans, a vos, nosse Pére,
èvoyîz voste Èsprit so l' pan et so l' vin qu' sont chal divant vos,
po qu' Jèzus vinse å mitan d' nos-ôtes avou s' cwér (†) èt avou s' sonk'.
4. Ashidædje
Li djoû di d'vant s' Passion,
adon qu' il èstît an trin d' magnî,
i prinda l' pan d'vins sès mins,
i d'ha mèrci a s' Pére,
èl pårtèdja èt l' distribuwa a sès dicipes tot d'hant :
« Tinez, magnîz-è turtos,
Çoula, è-bin c' èst m' cwèr
qui dj' done po vos-ôtes. »
Adon, i fa parèy
avou l' cålice rimpli d' vin.
Co on côp i d'ha mèrci a s' Pére
èt l' dina a sès dicipes tot d'hant :
« Tinez, buvez-è turtos,
pace qui çouchal, è-bin c' èst m' sonk',
li sonk' qui nos ralôye å Pére
èt ç' côp chal po todi,
come jamåy nos n' l' avans stu.
I sèrè n'né por vos-ôtes èt po turtos,
èt lès pètchîs sèront pardonés.
Et vos-ôtes, a vosse toûr, vos f'rez parèy
tot v' som'nant d' mi. »
Les Croeyeus :
Al tchûse :
Qui c' èst bê ! Qui c' èst grand !
C' è-st-on mistére èt nos l' crèyans.
Ou bin :
Vos-avez passé po l' mwért, Sègneûr Jèzus.
Nos l' brèyans bin hôt !
Vos v's-avez r'lèvé bin vikant !
Nos v' fans fièsse !
Vos-alez rim'ni èl glwére.
Nos v' ratindans.
5. Anamnejhe
Li Priyesse :
Nos fans fièsse po nos som'ni qui n's-avans fé l' påye
avou vos
èt nos volans fé savu lådje èt long çou qu' voste amoûr a stu
po nos-ôtes.
Tot sofrant, tot morant so l' creûs,
Jèzus, vosse Fi, a droviou l' ouh al novèle vèye
èt turtos ont rik'nohou s' glwére.
Loukîz-on pô çou k' nos v's-ofrans :
c' èst Jèzus qui s' done avou s' cwér èt avou s' sonk'.
C' è-st-insi qu' nos frôye li vôye
po nos miner disqu' a vos.
Sègneûr, vos qu' èst si amitieûs avou nos-ôtes,
dinez-nos l' Sint-Èsprit, qu' nos f'rè vèyî vol'tî :
C' èst l' Èsprit d' vosse Fi.
Et come nos-alans r'çure si cwèr èt s' sonk',
dinez-nos l' fwèce d' èl ravizer.
6. Ditikes
Fez d'hinde vosse bènèdicsion so nossepåpe ...
èt so noste Èvèke...
Pwis :
Al tchûse :
Dinez å cis qu' fêt voste Èglîse
di saveûr comprinde çou qu' vos mostrez
divins l' monde åtou d' nos-ôtes.
Fez nos crèh tot sûvant vosse parole.
Drovez nos coûrs a tos nos frés lès-omes.
Fez-nos prinde pårt à leûs ponnes èt leûs transes,
à leû-z-èspèrance èt leûs djôyes.
Fez qu' nos monstranse li vôye.
Ou bin :
Drovez nos-oûy a totes leûs mizéres.
Soflez-nos è l' orèye çou qu' nos fåt dîre qwand n's-èstans
d'vant onk di nos frés qu' èst tot miér-seû
èt qui n' sét pus a qué Sint s' vouwer.
Dinez nos l' corèdje di tende nosse min a nos frés
qu' n' ont pus d' tot rin èt qu' on språtche todi on pô pus'.
Fez qui, d'vins l' monde d' oûy,
voste Èglîse n' åye nin sogne di prôclamer l' vèrité
èt d' disfinde li lîbèrté, l' djustice èt l' påye,
po qu' èlle apwèrte a tos lès-omes in rêzon
d' èspérer mågré tot.
Pwis, après l' yene des deus k' on-z a tchuzî :
Loukîz bin dè roûvî, Sègneûr, tos nos frés
qu' ont clôs leûs-oûy èl påye dè Cris'.
Åyez' pîtié di tos lès cis qu' sont-st-èvôye po d' bon.
I-n-a qu' vos qui k'noh li trèfond d' leû coûr.
Minez-'lzès disqu' a vosse mohonne
èt fez-'lès si r'lèver å djoû dèl rèzrècsion.
Et nos-ôtes minmes, qwand n's-ariv'rans å-d'bout d' nosse vèye
so l' tére, ratindez-nos so vosse soû
èt lèyîz-nos rintrer,
qu' nos nos r'trovanse, turtos èssone
èt po d' bon, d'vins l' boneûr qui nos-èspèrans.
Avou l' Avièrje Marèye qu' a-st-avu l' aweûr d' èsse li mame
dè bon Diu, avou lès-apôtes, lès mårtîrs èt tos lès Sints,
nos v's-él dimandans
par Jèzus-Cri nosse Sègneûr.
C' èst gråce a lu èt avou lu
qu' nos v' fans fièsse
a vos, nosse Pére, qu' èst Mêsse dè monde
èt qui n' fêt qu' onk avou l' Sint-Èsprit
tot-å long dès siékes.
Les Croeyeus : Åmen.
Et pwis, dijhans l' Påtér, come l' a stî mostré sul pådje avou l' tecse del messe.
