1. Diewåde
Li Priyesse : Qui l' Sègneûr fuche avou vos !
Les Croeyeus : Et qu' i mwin·ne vos pinéyes.
Li Priyesse :
Fians monter bin wôt nosse keûr !
Les Croeyeus :
Nos l' douvians au Sègneûr.
Li Priyesse :
Dijans mèrci au Sègneûr, nosse Bon Diè !
Les Croeyeus : Ça n' èst qui d' jusse èt fwârt bon !
2. Grande Priyîre
Li Priyèsse :
Nos vos d' djans mèrci, a Vos, nosse Pa. On pout todi compter
sor Vos,
qui nos r'waîte si amitieûsemint.
Vos nos-avoz d'né Jésus vosse Fi, nosse Sègneûr èt nosse frére.
I nos-a mostré qu' i vèyeûve voltî lès
pôves, lès malades, lès p'titès djins
èt min·me lès cias què lî toûnenut leû dos.
Il a mau po nos quand i nos veut dins l' pènin.
Tot ç' qu' il a faît èt tot ç' qu' il a dit nos done à comprinde
qui Vos purdoz sogne des omes, come on pere prind sogne di sès-èfants.
C' èst po tot ça qu' nos Vos fians fièsse.
Nos criyans bin fwârt vosse bonté qu' Vos spaurdoz sur nos sins lachî,
èt avou lès-andjes èt tos lès Sints do Paradis, nos tchantans bin fwârt vosse
glwêre :
Turtos :
Sint, trwès côps sint
li Sègneûr, maîsse do monde ètîr !
Vosse glwêre rimplit l' ciél èt l' têre.
Hosanna ! Nos nè l' saurins criyî fwârt assez !
Qu' i fuche bèni l' ci qui vint dè l' paurt do Sègneûr !
Hozanna ! Criyans l' di tos nos pus fwârt !
Li Priyesse :
Nos tchantans vosse glwêre, Sègneûr !
Vos-èstoz tofêr dilé nos su l' vôye,
è co d' pus quand vosse Fi Jésus nos faît v'nu tortos èchone
nos-achîre à vosse tauve po viker dins s'-t-amoûr.
Come i l' a faît di ç' timps-là po lès dicipes d' Emmayus,
i nos faît comprinde çu qu' èst scrît dins l' Bibe
èt i paurtadje li pwin avou nos-ôtes tortos.
3. Epiclejhe
C' èst po ça qu' nos Vos l' dimandans a Vos, nosse Pére :
Evoyoz voste Èsprit su l' pwin et su l' vin qu' i gn-a vêci pa-d'vant Vos
po qu' Jésus vègne au mitan d' nos-ôtes avou s' cwârps (†) èt avou s' song.
4. Ashidædje
Li djoû di d'vant s' Passion,
timps qu' il èstint en trin d' mougnî,
I prind l' pwin dins sès mwins,
I dit mèrci à s' Popa,
I côpe li pwin à bokèts po fé lès paurts
Et I l' done a sès djins, tot d'djant :
« Tènoz, mougnoz-è tortos,
ça, c' èst m' cwârps
qui Dj' done po vos-ôtes. »
Adon, i faît l' min·me avou l' câlice rimpli d' vin,
Cor on côp i dit si r'con'chance à s' Pére,
I l' bènit èt I l' done à sès djins, tot d'djant :
« Tènoz, bèvoz-è tortos,
pace qui ça, c' èst m' song,
li song qui nos-r'lôye au Pére, po todi,
come nos n' l' avans jamaîs stî.
I sèrè d'né por vos èt po tortos,
èt tos lès pètchis sèront pârdonés.
Vos-ôtes èto, vos f'roz çoci
tot vos sov'nant d' mi. »
Les Croeyeus :
Al tchûse :
Qui c' èst bia ! Qui c' èst grand !
C' è-st-on mistére èt nos l' crwèyans !
Ou bin :
Vos-avoz passé pa l' mwârt, Sègneûr Jésus.
Nos l' criyans bin fwârt.
Vos V's-avoz r'lèvé vikant.
Nos Vos fians fièsse !
Vos-aloz riv'nu dins l' glwêre.
Nos Vos ratindans.
5. Anamnejhe
Li Priyesse :
Nos fians fièsse po nos sov'nu qu' nos-èstans r'mètus d' acôrd
avou Vos
èt nos v'lans fé sawe long et laudje çu qu' voste amoûr a faît
po nos.
Tot soufrichant èt moru su l' crwès,
Jésus, vosse Fi, a douviè l' uch à l' novele vîye
èt tot l' monde a r'conu s' glwêre.
Waîtoz çu qu' nos V's-ofrans :
C'èst Jésus qui s' done avou s' cwârps èt avou s' song.
C' è-st-insi qu' i nos douve li voye
po nos mwin·ner j'qu' à vos.
Sègneûr, Vos qui nos veut voltî,
D'nez-nos l' Sint-Esprit qui nos f'rè veûy voltî :
c' èst l' Esprit d' vosse Fi.
Et come nos-alans r'cîre si cwârps èt s' song,
D'nez-nos l' fwace dè lî r'choner.
6. Ditikes
Fioz dischinde vosse bènèdicsion su nosse Pâpe...
èt su noste Evèque...
Pwis :
Al tchûse :
A tos les cis qu' fêyenut voste Eglîje,
Donez-l' zî d' p'lu comprinde çu qu' Vos mostroz
dins l' monde autoû d' nos.
Fioz-nos crèche tot sûvant vosse parole.
Douvioz nosse keûr à tos nos fréres, lès-omes.
Fioz-nos paurtadjî leûs pwènes èt leûs transes,
leûs-èspwêrs èt leûs djôyes.
Fioz qu' nos l' zî mostranche
li vôye qui mwin·ne jusqu'à Vos.
Ou bin :
Drouvioz nos-ouy à totes lès miséres.
Choufloz dins noste orèye çu qu' i nos faut dîre quand n's-èstans
d'lé onk di nos fréres qu' èst mérseû
èt qui n' sét pus qué sint qu' i lî faut priyî.
D'nez-nos l' coradje do stinde nosse mwin à nos fréres qui n'ont rin
èt qu' on continûwe à sprotchî.
Fioz qui, dins nosse monde d' audjoûrdu,
voste Eglîje n' eûche nin peû d' criyî l' vraî
èt disfinde li libêrté, li justice èt l' paîs
po qu' èlle apwate à tos lès-omes one raîson
d' aurder l' èspwêr, maugré tot.
Pwis, après l' yene des deus k' on-z a tchuzî :
Waîtoz d' vos sov'nu, Sègneur, di tos nos fréres
qu' ont clô leûs-ouy dins l' paîs do Cris' ;
Purdoz pitié d' tos lès cis qu' sont-st-èvôye po d' bon.
I gn-a qu' vos po conèche li fond d' leû keûr.
Mwinrnoz-lès jusqu'à vosse maujone
Et fioz-lès r'lèver au djoû qui tot l' monde ravikerè.
Et quand nos-ôtes, nos-ariverans au d'bout d' nosse vôye
dissus l' têre, vinoz nos r'cîre su l' sou d' voste uch
èt nos lèyî rintrer
po nos r'trover tortos èchone
dins l' boneûr qui nos n's-agrançans après.
Avou l' Aviérje Marîye qu' a ieû l' boneûr do ièsse li moman
dau Bon Diè, avou l's-apôtes, lès mârtîrs èt tos lès sints
nos Vos l' dimandans
pa Jésus Cris, nosse Sègneûr.
C' èst grâce à Li èt avou Li
qui nos Vos fians fièsse,
A Vos, nosse Pére qu' èst l' maîsse do monde
Vos qui n' faît qu' onk avou l' Sint-Esprit
au d' truviès dès siékes à v'nu.
Les Croeyeus : Åmen.
Et pwis, dijhans l' Påtér, come l' a stî mostré sul pådje avou l' tecse del messe .
