|
|
|
LI MESSE E RFONDOU WALON |
|
Comince
Li Priyesse : Å no do Pere, do Fi et do Sint-Esprit.
Les Croeyants : Åmen.
Li Priyesse : K' el Bon Diu vos voeye voltî, et vos dner l' påye !
Les Croeyants : Asteure et disk' a todi.
Ricnoxhans nos petchîs.
Li Priyesse : Nos savans k' el Bon Diu nos vout do bén a tchaeke moumint ki passe. Portant, i nos arive do rovyî, et d' fé a nosse môde pus vite k' a l' sinne.
Les Croeyants : Nos n' fijhans nén todi l' droet do djeu.
Li Priyesse : Drovans nosse cour å Bon Diu.
Tertos :
Dji ricnoxhe divant vos, Signeur,
Et dvant mes frés
Ki dji n' a
nén todi tcheryî droet.
Dj' a sondjî do må, dj' a dit do må,
dj' a fwait do må,
Et, co pus sovint, dji m' a ratnou d' fé do
bén.
Awè, Signeur, dj' a må fwait.
Et d' totes mes foices dji
preye Notru-Dame,
Les andjes et tos les Sints,
Et vozôtes tertos, mes
frés,
Di dmander pardon å Bon Diu
Po tot çou k' dj' a fwait
d' må.
Li Priyesse : K' el Bon Diu åye pitié d' nozôtes, k' i nos pardone nos petchîs et k' i nos wåde adlé lu po todi.
Les Croeyants : Åmen.
Kiriyé
Signeur, prindoz pitié. (3 côps)
Vos, Criss, prindoz pitié. (3
côps)
Signeur, prindoz pitié. (3 côps)
Gloriya
Li Priyesse : Li Bon Diu n' est nén la come on djudje ki nos vout codåner, mins come on Pere ki nos voet voltî. I n' nos dmande k' ene sôre, c' est di n' nos nén distourner di si amour. Tchantans bén hôt s' bonté et s' grandeur.
Les Croeyants :
Li glwere å Bon Diu, k' est ådzeu did tot,
Et påye so l' tere a
totes les djins,
Pusk' elzès voet voltî.
Nos n' såréns dire
ki do bén d' Vos.
Nos savans bén ki Vs estoz grand.
Nos nos metans a
djnos dvant Vos,
Nos Vs fijhans fiesse,
Nos estans binåjhes di Vs saveur
si grand,
Vos, nosse Pere k' est Rwè et Mwaisse do monde,
Signeur
Djezus-Criss, vos k' est l' Fi do Bon Diu,
Ofrou po nozôtes come èn
agnea so l' åté;
Vos k' rabate les petchîs do monde,
Prindoz
pitié d' nozôtes.
Vos k' rabate les petchîs do monde,
Schoûtez
nosse priyire.
Vos k' est ashiou al prumire plaece adlé
l' Pere,
Prindoz pitié d' nozôtes.
Pask' i n' a
k' Vos k' est sint,
N' a k' Vos k' est
mwaisse,
N' a k' vos k' est åd dizeu
d' tot,
Djezus-Criss, avou l' Sint-Esprit,
El plinne glwere di
Diu, nosse Pere.
Åmen !
Raplovowe priyire
Li Priyesse : K' el Signeur soeye avou vozôtes !
Les Croeyants : Et avou vos tot fén parey.
Cisse priyire cial est dnêye come egzimpe, on ndè pout tchoezi ene ôte. Vos ploz vey sacwantès raplovowès priyires el prumire assinte (pol tins di tos djoûs, pol Sint-Esprit, po l' Aviedje Mareye, po les sints ).
Li Priyesse :
Signeur, vos ki moenne li monde,
Vos voloz ki nos cnoxhanxhe todi mî
Djezus-Criss
Et k' tot vicant l' mî possibe come I nos
l' kimande,
Nos drovanxhe bén lådje nos ouys a
s' loumire.
Nos vs priyans-st insi pa Djezus-Criss, vosse
Fi,
Nosse Signeur et nosse Diu,
K' est Mwaisse do monde
Avou Vos
et l' Sint-Esprit,
Åd triviè des siekes,
Asteure et disk' a
todi.
Les Croeyants : Åmen.
Epite
Li lijheu(se) :Lijhaedje
del lete (u: do
live) ...
On pout
prinde ene miete del Djeneze, par
egzimpe, k' a stî rmetowe pa Monsieu Lorint Hendschel, u on boket
d' l' Apocalipe.
Et po fini : C' est l' Bon Diu k' a cåzé (u: k' a djåzé; u: k' a pårlé)
Les Croeyants : Glwere å Vos, Signeur.
Såme & Alelouya
Vos ploz vey kékes såmes et alelouyas el 2-inme assinte .
Boune Novele
Li Priyesse : K' el Signeur soeye avou vozôtes !
Les Croeyants : Et avou vos tot fén parey.
Li Priyese : Li Boune Novele di Djezus-Criss come l' a scrît Sint...
Les Croeyants : Glwere å Vos, Signeur.
Li priyesse lét l' Boune Novele. Vos ploz prinde on tecse des Evandjîles ( Matî , Mår , Luk et Djhan ) rimetowes pal Pére Lecomte SJ, rimetaedjes ricnoxhous avou l' « Imprimatur » pa l' eveke di Lîdje, ki sont co dins l' accint del Hôte Årdene, u eto di l' Evandjile sicrîte pa Mår , rimetowe pa Djôzef Mignolet, ricnoxhowe avou l' « Imprimatur », pal vicaire djenerå d' Lidje.
Et po fini : Vola sur ene boune parole ! (u: C' est l' Bon Diu k' a cåzé; u: k' a djåzé; u: k' a pårlé).
Les Croeyants : Soeyoz beni, Signeur !
Credo
Li rmetaedje del Messe e walon d' Lidje n' a
pont d' Credo d' Nicêye Constantinope.
Si vos vloz prinde li Credo
d' Nicêye Constantinope, vos avoz ciddé on ratournaedje e rfondou
walon.
Dji croe-z en on seu Bon Diu, li Pere ki poite tot dins
ses mwins, k' a fwait l' Cir eyet l' tere, totes les djins et
totes les sacwès, les cenes k' on voet et les cenes k' on n' voet
nén.
Et dji croe-z en on seu Signeur, Djezus-Criss, li Fi då Bon Diu --
et s' n' a-t i yeu k' ci-la --, k' a nexhou do Pere, divant
tos les siekes; k' est Bon Diu skepyî do Bon Diu, loumire sikepieye del
loumire, vraiy Diu skepyî do vraiy Diu, k' a nexhou sins aveur sitî creyé,
li ci k' est del minme nateure k' el Pere, et k' c' est pa
lu ki tot a stî fwait.
Li ci ki, po nozôtes et po k' on soeye
schapés, a dischindou do Cir, et prinde li coir do Sint-Esprit et di
l' Aviedje Mareye, et divni ene djin come nozôtes.
Li ci k' a
stî crucifyî po nozôtes, do trevén da Ponce Pilåte, et k' end a sofrou
mårtire, et k' a stî eteré, et raviker l' troejhinme djoû, come les
Vîs Scrijhaedjes l' avént bén dit, et k' a monté å Cir, et ouy
k' est ashî al droete do Pere, et ki rvénrè avou s' glwere, po djudjî
les vicants et les moirts; et si rweyåme serè come en åbe k' on
n' voet nén s' copete.
Et dji croe-z e l' Esprit Sint, li
ci k' est Signeur eyet k' a fwait l' veye, ki sûne do Pere [et do
Fi], li ci k' on s' adjnole divant lu, et l' adegnî, sifwaitmint
kel Pere eyet l' Fi, li ci k' a pårlé pås profetes.
Eyet dji
croe-z en ene seule Eglijhe, sinte, catolike ey apostolike.
Dji ricnoxhe
on seu bateme po nos rmete nos petchîs.
Dji rawåde li ravicaedje des
moirts, eyet l' veye ki dmeurrè po todi.
Åmen.
Vos avoz eto vaici li Credo des apôsses :
Di tot m' cour dji croe å Bon Diu.
Il est nosse Pere et l' monde
est dvins ses mwins.
C' est lu k' a fwait l' cir et
l' tere;
Dji croe a Djezus-Criss
K' est s' Fi et nosse
Signeur.
I s' a fwait ome pa l' amour do Sint-Esprit
Et
l' Sinte Viedje Mareye l' a metou å monde.
Do trevén
d' Pilåte, il a sofrou moirt et passion.
On l' a clawé so
l' croes,
Il a rindou l' åme,
On l' a essevli.
Il a
dischindou adlé les moirts.
Mins l' troejhinme djoû, i s' a rlevé
bén vicant.
Il a rmonté s' ashir al droete di s' Pere.
On djoû,
i rvénrè po-z esse djudje des vicants et des moirts.
Dji croe å
Sint-Esprit.
Dji croe dvins l' Eglijhe, k' est la po l' monde
etir
Et k' pårtixh inte tertos çou k' el Bon Diu nos dene.
Dji
croe k' on pout todi esse pardoné
Et k' on djoû, on voerè tchaeconk
si rlever
Et viker po todi.
Åmen.
Priyire Daegnrece
Vos trovez sacwantès modêyes di priyire daegnrece, el 3-inme assinte .
Ofrixhaedje
On ndè pout tchanter ene antiene (ôtmint, èn ôte tchant). Metans :
Les pinsêyes do Signeur sont mierbounes; elle sipårdèt
l' djoye. Ses tuzas sont pus doûs k' el meyeuse låme. Savoz, Bon Diu,
ki vosse sierviteu wåde avou fwè vos tuzas.(Såme
18)
Les ofrixheus do Signeur ofrixhèt-st å Bon
Diu l' ecinse eyet l' pwin. Il s' ont dné å Bon Diu, et
s' ni djurront i nén so s' no. Alelouya !(Såme 21)
Toltins do
tchant, li priyesse ofrixh li pwin, tot djhant ci oremusse
cial :
Vos estoz beni, Diu
d' totafwait, Vos ki nos dene ci pwin cial, frut del tere et di
l' ovraedje des djins. Vo l' cial, i s' frè l' pwin del
veye.
Les corås rispondèt :K' el Bon Diu soeye beni asteure et
todi !
Adon, il metèt do vén et di
l' aiwe dins l' cålice, tot djhant :
Come ciste aiwe si maxhe avou l' vén, ki nos comunianxhe
del bondiusté do Ci k' a comunyî d' nosse
djintrinnisté.
Adonpwis, li priyesse ofrixh li
vén, tot djhant ci oremusse cial :
Vos
estoz beni, Diu d' totafwait, vos ki nos dene ci vén cial, frut del tere et
di l' ovraedje des djins. Vo l' cial, i s' frè l' vén do
rweyåme k' est po todi.
Les corås
rispondet :K' el Bon Diu soeye beni
asteure et todi !
Li priyesse dit-st
asteure èn ôte oremusse :
Vo nos cial
pitits et pôves : nos vs priyans, Signeur, acmoirdoz nos, po k' nost
ofrixhaedje soeye bon a Vos ouys.
Pu, i
s' lave ses mwins, tot djhant :
Rilavoz m' di totes mes fåtes et s' rischuroz
m' tchôdron.(Såme 50:1)
Priyire so les ofrandes
Li Priyesse :Priyîz, mes
frés et mes soûs, po k' el Bon Diu rçuve comifåt noste ofrande, lu ki poite
tot dins ses mwins.
Les Croeyants :K' el Signeur riçuve di vos mwins l' ofrande, po
l' boune parole et l' glwere di s' no, po çou k' nos avans
mezåjhe et çou k' el Sinte Eglijhe a dandjî.
Li priyesse dit l' priyire so les ofrandes, k' est
ene priyire candjrece. Vos trovroz sacwantès modêyes el 4-inme assinte .
Priyires ucaristikes
I fåt prinde ene des cwates priyires ucaristikes
riloukîz pus bas.
Tote ucaristike priyire a-st on adrovaedje a leye, al
boune plaece.
1. Prumire Priyire ucaristike (li roman canon).
2. Deujhinme priyire ucaristike.
3. Troejhinme priyire ucaristike.
4. Cwatrinme priyire ucaristike.
5. Priyire ucaristike po les rapoûlædjes.
Pwis :
Påter
Li Priyesse : Come vosse prôpe Fi nos
l' a-st acsegnî et come i nos l' a cmandé, nos n' avans nén sogne
do dire :
Tertos djhet l' priyire do
Signeur :
Vos, nosse Pere k' est la
hôt,
Ki vosse nom soeye beni cint côps.
Ki li djoû vegne k' on vs
ricnoxhe come Mwaisse.
K' on vos schoûte sol tere come å cir.
Dinez
nos ådjourdu li pwin po nosse djournêye.
Fijhoz ene croes so tos nos
petchîs
Come nos l' fijhans eto so les petchîs des ôtes.
Ni nos leyîz
nén tchair dins l' eveye di må fé,
Mins tchessîz li må lon erî di
nozôtes.
Des ôtès modêyes del påter : drocial.
Li Priyesse :
Awè, tchessîz tos les må lon d' nozôtes, Signeur,
et dnez
l' påye å monde.
Do moumint ki vs estoz bon, disloyîz nos do
petchî.
Rapåjhtez nos dvant les racros di ç' veye chal :
Nos
contans bén sol l' bouneur ki vs prometez
et nos ratindans
k' Djezus-Criss nos rvénxhe såver.
Les Croeyants :
Å resse, c' est a vos et a vos tot seu
ki rvént li glwere
d' esse nosse Rwè
et nosse Mwaisse,
tot å long des siekes.
Åmen.
Li Priyesse :
Signeur Djezus-Criss,
Vos avoz dit ås apôtes :
« Mi påye, dji vs el
lai.
Mi påye, dji vs el dene. »
Ni fjhoz nén asteme a nos petchîs,
mins
sovnoz vs seulmint ki tos nozôtes,
nos croeyans e vos.
Po k' nos
sepanxhe fé come vos l' voloz
dinez nos todi vosse påye
et
k' tot fjhant hôt,
nos vs shuvanxhe tertos sol minme voye.
Vos, nosse
Mwaisse,
tot å long des siekes.
Les Croeyants : Åmen.
Li Priyese : K' el påye do Signeur soeye todi
avou vozôtes !
Les Croeyants : Et
k' ele rimplixhe nos cours !
Agnus Dei
Tertos :
Signeur, come l' agnea so l' åté,
vos k' a pris so ses
spales tos les måcmints do monde,
prindoz pitié
d' nozôtes.
Signeur, come l' agnea so l' åté,
vos
k' a pris so ses spales tos les måcmints do monde,
prindoz pitié
d' nozôtes.
Signeur, come l' agnea so l' åté,
vos ki
roveye po d' bon çou k' les omes ont fwait d' må,
acoirdoz nos
vosse påye.
Comunion
D' aprume, toltins u après k' el priyesse
fwait l' pårtixhaedje do pwin ucaristike, on ndè pout dire ene priyire di
dvant d' comunyî, l' ene des deus prumires del 6inme assinte. Cwand li
priyesse met dins l' cålice ene miete do pwin ucaristike, i dit cisse
oremusse cial :
K' el coir et
l' sonk do Criss, raploûs dins
ç' cålice cial, soeyexhe nosse marinde pol veye todiyrece.
Pwis :
Li
Priyesse :
K' i soeyexhe binåjhes les cis
k' el Signeur preye a
s' tåve !
La vosse Signeur, l' evoyî do Bon Diu,
po
poirter nos måcmints !
Les Croeyants :
Signeur dji n' so nén bon assez po vs riçure,
mins vs n' avoz
k' on mot a dire
et dj' sere rmetou so pîs.
Tot comuniant, li priyesse
dit :
K' el coir do Criss mi
wåde pol veye todieusse !
K' el sonk do Criss mi wåde pol veye
todieusse !
Tot dnant li comunion azès
croeyants, on leu dit :
Li coir do
Criss. Li sonk do Criss.
El tins del
conumion, on pout tchanter ene antiene, par egzimpe :
Dji pudrè
l' cålice del rischaedje et dji houcrè l' no do
Signeur.
Cwand li priyesse lave li cålice,
i dit :
Signeur, nos vlans riçure voltî
dins nos cours li ci k' nos avans magnî. Ki cisse comunion sol tere soeye
ene marinde pol cir.
Priyire apres l' comunion
Li Priyesse :Priyans l' Signeur.
Li pan ki vos nos avoz dné, Signeur,
nos a fwait on novea cour.
I
fwait crexhe nos croeyances, i fwait crexhe l' esperance
et nos dene li
foice di vey voltî nos frés.
Aprindoz nos a todi aveur fwin do Criss,
lu
k' est l' seu pan ki nos dene li veye.
Aprindoz nos, Signeur a
viker des paroles
ki vénront di vosse boke.
Nos vs priyans-st insi par
Djezus-Cris, vosse Fi,
nosse Signeur et nosse Diu,
k' est Mwaisse do
monde
avou vos et l' Sint-Esprit,
åd triviè des siekes,
asteure et
todi.
Les Croeyants : Åmen.
Li messe est foû
Li Priyesse : K' el Signeur soeye avou
vozôtes !
Les Croeyants : Et avou vos
tot fén parey.
Li Priyesse : K' el
Bon Diu vs benixhe, li Pere, li Fi et l' Sint-Esprit !
Les Croeyants : Åmen.
Li
Priyesse : Alans è avou l' påye do Criss.
Les Croeyants : Et co cint côps gråces,
Signeur.
|
|